Über mi
Erfahr meh über e Hingergrund und d Motivation vo "rhythm & soul".
Hie möcht ig dir e Iiblick hinger d Kulisse ermögliche und dir Glägeheit biete, mi chly besser lehre z kenne, bevor mir üs de i eim vo mine Kurse persönlich begägne...
Mit em Motto "feel the rhythm and free your soul" hani nach 20 Jahr Tanzerfahrig d Entscheidig troffe und dr Muet gfasst, mini Liideschaft mit angerne z teile - ou usserhalb vom Turnverein.
Mi Name isch Michelle Mühlethaler und ig bi d Gründerin vo "rhythm&soul". Sit mire Chindheit het mi s Tanze begleitet, schänkt mir immer wider nöii Energie und zouberet mir es no breiters Lächle ufs Gsicht. Bsungers die rhythmische Bewegige zu mitriissender Musig und d Freiheit vom säuber Choreographiere, wo s Tanze mit sich bringt, hei mi zu däm Schritt inspiriert.
Ig biete dir nid nume "StepAerobic", wo di spätischtens am Mäntigabe söu ufwecke, sondern ou "Latin-Mix Solo", wo di am Donnschtigabe beschwingt is Wuchenändi laht la gleite.
Mis Ziiu isch, dir nid nume es motivierends Workout z biete, sondern di ou emotional und mental z sterche, sodass du di i mine Kurse rundum wouh füeuhsch. Lah üs zäme d Rhythme la gspüre und dr Alltagsstress la vergässe.
Ig bi 29i und schaffe aus ahgsteuti Physiotherapeutin z Bärn. Mi Bruef isch eher Beruefig und laht mi nie ganz los...
Tanze isch nid nume die beschti Demänz-Prophylaxe und wichtig für d Verbindig vor rächte und linke Hirnhäufti, sondern eifach ou e tolli und glänksschohnendi Bewegigsform, egal i welem Auter.
Ig säuber bi mit 9i im Turnverein Längnou zum Tanze cho, woni immer no aktiv derbii bi. Ahgfange het aues mit "Gymnastik Chlyfäud". Mit viiune Kurse, Workshops und ou online hani nach em "J+S Grundkurs Gymnastik+Tanz" Erfahrig gsammlet in Jazz, Salsa, Rumba, Contemporary, StepAerobic, Tango, Cha-cha-cha und Yoga Dance Flow.
Mit "rhythm&soul" möcht ig mir e Troum erfülle und mini Fröid und Liideschaft am Tanze ou usserhaub vom Turnverein wytergäh.
"Tanzen ist wie träumen mit den Füssen"
[unbekannt]
Kontakt
Möchtisch du meh über mini Kurse erfahre oder di diräkt ahmäude? Ig fröiie mi uf dini Nachricht!